احـــذر الوقوع فى فخ الاحتياج

مادعانى الى كتابه هذه الرساله هو اخذ مشورتكم فى موقف تكرر امامى فى الفتره الاخيره كثيرا وربما حدث معى ايضا وهو عدم اتمام الخطوبه بالنهايه السعيده التى يتمناها كل شخصين مخطوبين

_

_

فلقد لاحظت فى الفتره الاخيره عدد غير قليل من اصدقائى لم يتمم خطبته بالزواج بالرغم من ان معظمهم كان شارى الطرف الاخر جدا ومتقبل عييوبه قبل مميزاته ومبسوط بس للامانه كان كلهم مشتركين فى شىء اخر ان اهاليهم كانوا شايفين الموضوع غير متكافىء

يعنى كل اللى حواليهم شايفين الموضوع مش ماشى الا هما

_

_

طبعا اقدار ربنا كلها خير وطالما ربنا ماأردش ان الموضوع يتم يبقى هو ده الخير بالتاكيد وياما ناس كانوا مقتنعين ببعض جدا وبعد الزواج اكتشفوا ان اللى قدامهم ناس تانيه خالص

_

_

المهم اللى عايز القى الضوء عليه هنا هو مااسميته مجازا بظاهره الاحتياج واقصد بيها تلك الفطره اللى ربنا خلقها سواء فى الولد او فى البنت من احتياجه الطبيعى للطرف الاخر وان حد يهتم بيه ويسأل عليه ويهتم لأموره وشؤونه ويفضفض معاه والحلم الطبيعى لاى شاب او فتاه فى تكوين الاسره الخاصه الصغيره .....احيانا مع بعض الناس ظاهره الاحتياج دى بتخلى اى طرف يتقبل الطرف التانى مهما كانت عيوبه وفى اللحظه دى بيبقى التعلق مش بالشخص ده فى حد ذاته ولكن بيكون بفكره الاستقرار وانه لقى او لقيت حد يسأل عليه ويهتم بيه فمجرد وجود الشخص ده بينسيه عيوب الاخر بس المشكله ان النسيان ده وقتى بمرور الوقت ومع ارواء عاطفه الاحتياج دى لو فعلا هو ماكانش متعلق بالشخص ده لصفاته الخاصه هنا فعلا هاتحصل مشاكل كتير ....علشان كده بنبه اصحابى اتأكدوا كويس قوى من صدق مشاعركم تجاه من تختارونه شريك لحياتكم ده واجبكم تجاه الاخر والطرف الاخر لازم يكون هو كمان متاكد من الموضوع ده وحكموا عقلكوا فى التصرفات اللى بتحصل فى فتره الخطوبه لان بيكون ليها مؤشرات مهمه وواضحه فى معظم الاحوال للى هايحصل بعد كده وماتبنوش ارائكم على حاجات اعتياديه بمعنى ايه ؟ واحد من اصحابى مثلا كان فرحان جدا بالخطوبه لانه بيكلم خطيبته كل يوم

_

_

طبعا ده شىء كويس لكن ماينفعش يكون ده دليل على ان الخطوبه ناجحه لان فى الغالب اى اتنين مخطوبين فى الاوساط العاديه بيتكلموا كل يوم ولو هما سابوا بعض اللى هايتخطبوا ليهم بعد كده هايكلموهم كل يوم برده

فصاحبنا ده ظاهره الاحتياج انه يكلم حد كل يوم طغت على عقله وخلته مش شايف الاخر بصورته االحقيقيه لانه عايش فى سعاده ومش عايز الوضع ده يتغير مع انه لو خطب اى واحده غيرها برده هايكلمها كل يوم

انا مش عايز اصعب الامور بس الخلاصه اتأكدوا كويس وفرقوا بين محبتكم لشخص بعينه وبصفاته وانه فعلا مميز ويستحق انه يكون شريك حياه وبين احتياجكم للحياه الخاصه بوجه عام وماتتنازلوش فى انكم تختاروا شريك كفء علشان تعيشوا حياه صحيه ومتزنه وسعيده ان شاء الله

حد موافق على الكلام ده ؟