اولا انا مبسوط جدا ان فى ناس بدأت تتفاعل مع البلوج وترد على المساهمات ده شىء اسعدنى جدا بجد
_
_
بالمره كده بما اننا كنا بنتكلم عن الاحتياج انا ليا تصور برده عن موضوع الاختيار وقبل مااقوله احب ااكد بس ان ده رأيى الشخصى ومجرد خاطره قد تحتمل الصواب او الخطأ وكلامى مش قاعده اكيد
_
_
علشان نختار صح لازم الاول نعرف نختار ازاى ومين وليه كل واحد طبعا قد تختلف اجابه السؤال ده بالنسباله على حسب اولوياته فى الحياه
ولو عرفنا نختار ازاى او مين اللى يناسبنا هايوفر علينا كتير لاننا هانكون حددنا خلاص الهدف ويتبقى مهمه البحث عنه لكن البحث من غير تحديد الهدف بيعمل علاقات غير متكافئه
_
_
قبل مااكمل بفكركوا ان الكلام ده مجرد خاطره مش اكتر
_
ابدأ بالسؤال اللى المفروض يتبادر الى الذهن ابتداءا الا وهو ايه اللى بيخلى اتنين مبسوطين فى علاقتهم؟
_
وانا هنا ااقصد الانبساط طويل المدى يعنى متجوزين من 10 او 20 سنه وتحس انهم لسه مخطوبين
فى ناس هاتقول الحب لو بيحبوا بعض هايكملوا مبسوطين
_
الحقيقه ان دى اجابه تحتاج بعض التوضيح وماينفعش تكون مطلقه طب هو ايه اللى خلاهم يحبوا بعض؟
_
انا مش بتكلم عن الاعجاب الشكلى او الظاهرى بحركات معينه او اسلوب معين لا الموضوع اعمق من كده
حالات الحب الفريده دى بتتكون لما بيكون فى تقارب كبير فى الطباع والميول وممكن يكونوا فى اول جوازهم ماكانوش كده بس ربنا وفقهم وجمع بينهم واكتشفوا انهم قريبين قوى من بعض فتعمقت العلاقه
_
يعنى اننا ااقصد ان فى معظم الاحوال سبب السعاده فى العلاقه انه يكون فى تقارب بين الطرفين اجتماعيا وثقافيا وفكريا هنا بس بيتوجد مساحات لانهائيه من التقارب والود علشان التقارب الفكرى والثقافى ده بيوجد اشياء مشتركه بينهم والاشياء المشتركه دى بتعمل ذكريات جميله هى اللى بتعمل قيمه للحياه مع هذا الانسان
_
زى مابقول انا بتكلم على الغالب مش قاعده يعنى لو فرضنا دكتوره او مهندسه مثلا اوهمت نفسها انها بتحب شاب معاه اعداديه مثلا او مؤهل متوسط تتوقعوا نسبه نجاح العلاقه دى اد ايه هى للاسف بتبص على العلاقه دى دلوقتى مش شايفاها كمان 5 سنين ومفكرتش ايه مساحه الحوار المشترك اللى ممكن تنشأ بينهم وايه العادات اللى هو متعود عليها واللى هى متعوده عليها
انا ضربت مثال واسع شويه علشان الصوره تبقى واضحه لكن تعالوا نديقها شويه
اتنين من نفس الليفل الاجتماعى لكن الميول مختلفه هو عايز يطلع الولد مطرب وهى عايزه تطلعه حافظ للقران هو متعود يصيف فى شرم وهى بتموت فى جمصه
_
_
علشان مانقعش فى الفخ ده لازم نكون صرحاء جدا فى البدايه مع الشريك الاخر ونحاول نكون طبيعين فى تصرفاتنا وافعالنا على قد مانقدر ومانتكسفش اننا نعبر عن ميولنا واتجاهاتنا وطباعنا ومش اى حد نعجب بيه من مجرد نظره او كلمه يبقى هو ده الشخص المناسب
_
طبعا مفيش اتنين هايكون متطابقين تمام التطابق فى كل حاجه بس هايكون فى اتنين متفقين على طريق واحد واسلوب واحد للحياه
واهداف ان لم تكن واحده فهى فى نفس الطريق
_
_
واهم مافى الموضوع ده كله الطلب من الله باخلاص انه يوفقك لاختيار الشريك المناسب وعلى قدر صدق طلبك من الله ربنا هايكرمك ان شاء الله
No comments:
Post a Comment